2022 жылғы 13 желтоқсан күні Н.Байғанин атындағы облыстық балалар кітапханасы №52 негізгі орта мектебінде Қазақстан Республикасының  Тәуелсіздік күніне арналған «Отаным десем ойыма...» патриоттық әдеби кеш ұйымдастырды. Тәуелсіздік – баға жетпес байлық екендігі түсіндіріліп, балалардың дүниетанымдарын кеңейтетін белгілі ақындардың өлеңдерімен қатар, «Тәуелсіздік – ел ұраны» әні орындалды.

     Оқырмандар назарына  «Тәуелсіздік – елімнің ерлік жолы»  кітап көрмесі ұсынылып, киелі Отанымыздың тарихи даму жылдарына библиографиялық шолу жасалды.

     Бүгін Халықаралық сыбайлас жемқорлыққа қарсы күрес күні. №11 орта мектеп-гимназиясында 5 сынып оқушылары арасында «Сыбайлас жемқорлыққа «ЖОҚ» дейік!» тақырыбында интерактивті ойын өткізілді. Қатысушыларымыз парақорлық туралы сұрақтар бойынша белсенділік танытып,  өз пікірлерін орта салды.

     2022 жылғы 8 желтоқсанда Н.Байғанин атындағы облыстық балалар кітапханасында «Ымырттағы кітапхана» аясында «Елім менің» квиз өткізді.

     Қазақстанның өткені мен бүгінгі өмірінен сыр шертіп, еліміздің даму тарихына терең бойлайтын әдеби зияткерлік ойынында М.Құсайынов атындағы дарынды балаларға арналған мамандандырылған лицей-интернатының 7 сынып оқушылары қатысты.

     Балалар  тіл сауаттылығы мен тұрақты тіркестер, көне сөздер мен ел тарихындағы тұлғалар туралы бейне сұрақтарға жауап беріп, тартысты ойын үлгісін көрсетті.

     2022 жылғы 8 желтоқсанда Н.Байғанин  атындағы облыстық балалар кітапханасы Тәуелсіздік күніне арналған «Тәуелсіздік – бастауы бар бақыттың!» патриоттық акция ұйымдастырды.

     Шараның  мақсаты: балалардың рухани мәдениетін байытып, туған елі мен жерін қастерлеуге тәрбиелеу; балалар әдебиетін насихаттау; балалардың білімге құштарлығын арттыру.

     Кітапхананың белсенді оқырмандары М.Құсайынов атындағы дарынды балаларға арналған мамандандырылған лицей-интернатының, Есет батыр атындағы олимпиада резервінің облыстық мамандандырылған мектеп-интернат-колледжінің, Б.Момышұлы атындағы №62, №45, І.Есенберлин атындағы №15 орта мектептерінің оқушылары «Жарқыра, жанған  күндей  Тәуелсіз  ел!» мерекелік бағдарламасын ұсынды.

     Жас патриоттар назарына   «Тәуелсіздік – баға жетпес байлық» атты кітап көрмесі ұсынылып, библиографиялық шолу жүргізілді.

     2022 жылғы 7 желтоқсан күні Н.Байғанин атындағы облыстық балалар кітапханасы №45 орта мектебінің ашық  алаңында  сыбайлас  жемқорлыққа қарсы күреске бағытталған «Бұл – адалдық пен әділдік үшін күрес» әңгімесін өткізілді.

     Жас ұрпаққа сыбайлас жемқорлық деген ұғымды түсіндіріп, адамгершілікті өз шығармаларының туы жасаған Абай, Шәкәрім бастаған қазақ классиктерінің  асыл мұраларын  насихаттап, адалдық біздің жан дүниемізден, істеген істерімізден, жасаған қарым-қатынасымыздан көрінетіні туралы айтылып, Сыбайлас жемқорлыққа қарсы күрес туралы заңдарды негізге ала отырып, оқырмандарға  ақпарат берілді.

     Оқырмандар назарына «Адал еңбек еткенге бақыт басын иеді» атты кітап көрмесі жасақталып,  А.Смағұловтың «Сыбайлас жемқорлық қылмысқа қарсы күрес проблемалары» атты оқу құралы, А. Айталының «Қазақты намысы қамшыласын» кітабындағы «Жемқорлардың өз пирамидасы бар» публицистикалық мақаласы, А.Тайжан «Парыз бен пайым» кітабындағы коррупция оның тарихы мен мәні, ерекшелігі туралы мақаласы, Н.Төлепбергенұлының «Жемқордың жеткен жері» , публицист Ж.Құлиевтың «Шындық – жалғыз, сұмдық- мың» кітаптары мен Абдрахман Асылбектің «Ұр, тоқпақ!» атты  мысалдар, сатиралық өлеңдері, Н. Төлепбергенұлының «Жемқордың жеткен жері» атты сықақ әңгімелер жинағы ұсынылды.

     2022 жылғы 1 желтоқсан күні «Ымырттағы кітапхана» жобасы аясында Н.Байғанин атындағы облыстық балалар кітапханасында «Оқимыз. Ойлаймыз. Армандаймыз» интеллектуалды ойыны ұйымдастырылды. Шараға кітапхананың белсенді оқырмандары, №42 жалпы білім беретін орта мектептің 6 сынып оқушылары қатысты.

     Сегіз кезеңнен құралған ойында балалар «Кітапсүйерлер» және «Кітапқұмарлар» топтарына бөлініп,  әдебиет, поэзия, дүниетаным тақырыптары бойынша білімдері мен тапқырлығын көрсетті.

     «Кітаптың үйі – кітапхана» кезеңінде балалар оқыған кітаптарынан алған әсерлерімен бөліссе, «Сұрақтар керуені» бөлімінде түрлі тақырыпта сұрақтарға жауап беріп, өз білімдерін ортаға салады.