2023 жылғы 20 қаңтар күні Н.Байғанин атындағы  облыстық балалар кітапханасы «КітапҰstar» жобасы аясында балет артисі Нұрсұлу Тапалованың туғанына 100  жыл толуына арналған  «Өнер.Өмір.Өнеге.»  АRT-сағатын өткізді. Оқырмандар назарына «Сұлулығы әлемнің өрнектелген өнермен » кітап көрмесі ұсынылып, қазақ би өнерінде  өзіндік із қалдырған, өнердегі биік тұлға - жерлесіміз Нұрсұлу Тапалованың өмір жолы мен еліміздің өнері мен мәдениетін өркендету жолында қосқан  еңбектері туралы кеңінен сөз қозғалды.

Шараға М.Құсайынов атындағы дарынды балаларға арналған облыстық мамандандырылған мектеп интернатының би үйірмесінің жетекшісі Айгүл Бекболатқызы Шайманова мен жас бишілер қатысып, , бишінің қозғалысы мен дене қимылы арқылы көркем образды бейнелейтіндігі,  қазақ биінің өмірдің өзінен алын­ғандығы туралы айтып,  бишілеріміз бидің құдіретті де сиқырлы әлемін өнерлері арқылы жеткізді.

          2023 жылғы 13 қыркүйек  күні  Н.Байғанин атындағы облыстық балалар кітапханасы  Мемлекет қайраткері Темірбек Жүргеновтің  туғанына 125 жыл толуына арналған республикалық ғылыми-практикалық конференция аясында Б.Момышұлы атындағы №62 орта мектепте өткізілген Зейнеп Ахметова мен Орынша Қазыбаевамен кездесу кешінде «Мәңгілік өмірге, мәңгілік өнегеге айналған есімдер» атты  кітап көрмесін ұйымдастырды. Кітап көрмесінде аты аңызға айналған Бауыржан Момышұлы мен қайсар қазақ батыры Рақымжан Қошқарбаев туралы әдебиеттер және жазушы Кәкімжан Қазыбаевтың, Бақытжан Момышұлының, Зейнеп Ахметованың кітаптары ұсынылып, ұлтын ардақтаған  көрнекті тұлғаларымыздың ел мүддесі үшін атқарған ерең еңбегі туралы ақпарат беріліп, ұрпаққа үлгі етілді.

2023 жылғы 7 қыркүйек күні Н.Байғанин атындағы облыстық балалар кітапханасында «Шаңырақ» отбасылық оқу клубының отырысы өтті.  Отбасы күніне арналған «Салт-дәстүр – ұлттық тәрбие негізі» тәрбие сағатына клуб мүшелері, педагогикалық  колледжі жанынан ашылған  «Зерде» жеке мектебің оқушылары қатысты.

«Заречный тұрғын алабы мектеп-бала бақша кешені» КММ-нің кітапханашысы Асем Алшынқызы Тургалиева баланың тәрбиелі болып өсуіне берекелі отбасының берер әсері мол  екеніне тоқталып, «Ұяда не көрсең, ұшқанда соны ілерсің» дегендей, баланың болашақта жақсы азамат болып өсуі, тәрбиелі болуы отбасында берілетін тәрбиеге байланысты екенін атап кетті. «Білім» мектебінің 4-класс оқушысы Лилия Кенжағалидің  анасы Диана Байтуғанқызы Сарсенбаева қазақ халқының ырым мен тыйымдары, әдет-ғұрпына тоқталып, отбасымен бірге оқыған кітаптарынан алған әсерлерімен бөлісті.  

Тілдер мерекесіне орай балалар кітапханасы «Ана тілім – ардағым» атты кітап көрмесін ұйымдастырды. Аталмыш  көрмеге кітапхана қорындағы тіл тақырыбына қатысты кітаптар, газет–журналдар беттеріндегі мәліметтер ұсынылып, библиорграфиялық шолу жасалды.Айтулы мерекеге орай №15 «Жидек» бөбекжай балабақшасының тәрбиеленушілері қонақ болып келді.  Мемлекеттік тілдің қолданыс аясын кеңейту, мәртебесі мен маңызын кеңінен насихаттау мақсатында «Мемлекеттік тіл – менің тілім!» тақырыбында  «Библиошар», «Сұрақ-жауап» сияқты түрлі ойындар ойнатылды.

2023 жылғы 31 тамыз күні  Н.Байғанин атындағы облыстық балалар кітапханасы «Ымырттағы кітапхана» мәдени-әлеуметтік шарасы аясында «Әр азаматтың өз биігі бар» деген атпен «Кітап. Тұлға. Рух.» жобасының кезекті шарасын өткізді.

Шараға    «Спорт жұлдыздары»  журналының  бас редакторының орынбасары Еркін Серікқалиұлы мен «Капоэйра» афро-бразилиялық жекпе-жек өнері үйірмесінің жаттықтырушысы Ерлан Қабылбайұлы Білісбаев қатысып, адамның мақсатқа жетіп, биіктерге көтерілу үшін рухани байлықтың және денсаулықтың қажеттігін, білімді, тәрбиелі әрі дені сау ұрпақ – ұлттың ең қымбат байлығы екенін айтып, өздерінің жетістіктерімен бөлісті. Оқырмандардың сұрақтарына жауап бере отырып,  қоғамдағы жалпы мәдениеттің бір бөлігі және денсаулықты  нығайтудағы жол, жас ұрпақтың бойына тазалық пен сергектікті қалыптастыратын - спортпен шұғылдануға шақырды.

2023 жылғы 23 тамыз күні Н.Байғанин атындағы облыстық балалар кітапханасы №15 Жидек бөбекжай балабақшасына барды.  «Let’s play and read» жобасы аясында  «Балақайға еркелі, Айтайық қызық ертегі» оқу сағаты   «Күншуақ», «Балдаурен», «Балапан» тобының балаларының қатысуымен өтті.

Шара барысында балаларға , «Өсімдіктер мен кемпірқосақ» ертегісі оқылып, әртүрлі ойындар ойналды.Сонымен қатар, бүлдіршіндерге «Ертегі әлемінде» атты кітап көрмесі ұйымдастырылып,таныстырылды.